YBEX

YBEX Newsroom Media Coverage

YBPay Featured on Apple Daily 【去旅行去到盡】唱錢邊度最平? 一app睇晒外幣兌換價

Monday, July 17 2017

你有冇試過周街搵找換店?有冇發現同一種外幣有好多唔同嘅滙價?有個app可以即時幫你比較多間找換店嘅滙價,你唔駛嘥時間同捱貴價,佢會幫你用至抵價錢,搵到心水嘅找換店。講緊就係外滙格價app YBPay。

銀行界出身嘅李振寧(Andrew)及李恢恢(Hui)2015年尾成立公司Ybex,希望提供一個透明公開嘅外滙格價平台,理念就似一般酒店、機票格價平台。公司今年2月始推出手機app YBPay,協助提供找換及跨起滙款服務,幫用戶搵找換商。

Apple Daily shot

行政總裁Andrew本身喺投行從事外滙交易,講到唱錢去旅行,佢就有個唔係幾好嘅體驗,「我去本身個銀行問完個價之後,作為一個FX trader,佢畀呢個價,我就覺得有小小侮辱性嘅,所以我就去咗好出名嘅一間樓上嘅找換店,排隊排咗差唔多半個鐘,其實最終我可能慳咗30零蚊40蚊,但就冇咗個lunch time。」

Andrew相信,有好多人都會同佢一樣,唔會想硬食銀行「侮辱價」,又唔想嘥時間格價、排隊,於是就同從事高頻交易技術工作嘅同事Hui,亦即Ybex技術總監,離開銀行,一同創業。

YBPay推出近半年,註冊用戶有近萬個,但大多數以使用滙款功能的外傭為主,而找換店合作夥伴暫時有30幾間,橫跨香港多個區。Andrew表示,陸陸續續將更多找換店加入平台,以吸引更多本地香港人使用,「如果你喺上環,你搵到間喺大埔平20蚊嘅,冇理由嘥時間走入去嗰度唱錢,我哋個想搵多啲partner入嚟,遍布全港,梗有一間係你附近。」

Andrew強調,佢地並唔係一個找換商,而係一個平台,除咗滙價,平台仲會提供找換店嘅營業時間、地點等資料,又設有用戶評分制,幫用戶滙錢到外國或者換錢去旅行時,更方便搵到最合適嘅找換商。另外,外幣滙率瞬息萬變,平台讓用戶鎖定滙價,輸入兌換金額直接落單,而用戶需在該日內到找換店舖以現金交易。

據了解,Ybex獲得美圖(1357)的基礎投資者之一京基集團,作為種子投資者,投資了50萬美元,公司總融資額約150萬美元。Andrew指出,Ybex不會向用戶收費,現只向找換商收取象徵式手續費,公司正在增長階段,以擴大客戶群為主,未有盈利,現每月處理交易額過百萬元。他希望用戶數目今年可達到六位數字,未來短期將進軍新加坡及倫敦市場,而打好根基後,中長線目標是發展內地業務。

記者:曾木秀

報導來源: Embedded content: http://hk.apple.nextmedia.com/realtime/finance/20170718/56967846